Në një konferencë të përbashkët shtypi me kancelaren gjermane, Angela Merkel, në Paris, presidenti francez, Emmanuel Macron pohoi se nëse Britania kërkon më shumë kohë, ata do ta shqyrtonin kërkesën për shtyrje, por gjithnjë nëse ajo justifikohet nga zgjedhjet e reja nga ana e Britanisë. Gjithsesi Macron përsëriti se marrëveshja e tërheqjes nuk mund të rinegociohet.
Edhe kancelarja Merkel pranoi se dhe për të kërkesa për më shumë kohë për Britaninë do të ishte e logjikshme, me kusht që të realizohet një “Brexit” i rregullt.
“Ne në fakt po i afrohemi daljes së Britanisë nga Bashkimi Europian, në fund të muajit tjetër. Unë jam plotësisht dakord dhe e kam diskutuar këtë me Theresa Mayn pak ditë më parë, që marrëveshja e daljes është e vlefshme. Nëse Britania ka nevojë për më shumë kohë, ne nuk do ta refuzojmë këtë, por ne po kërkojmë një zgjidhje të rregullt, një dalje të rregullt të Britanisë nga BE-ja”, tha Angela Merkel.
Ndërsa kryenegociatori i BE-së për “Brexit”-in, Michel Barnier tha se në një skenar të tillë, Britani duhet të argumentojë qartë së çfarë do të bëjë në “kohën shtesë”.
Kujtojmë se kryeministrja britanike, Theresa May bëri një kthesë të madhe në strategjinë e saj. Ajo u premtoi deputetëve se do t’i lejojë ata të shtyjnë “Brexit”-in, pas kërcënimeve për dorëheqje masive nga radhët e ministrave të saj./E.M
