Kryetari i PD Sali Berisha është rikthyer pas një kohe relativisht të gjatë në studion e “Opinion” në Tv Klan. Arsyeja ka qenë padyshim masa e “arrestit në shtëpi” e caktuar ndaj tij para një viti. I pyetur nga drejtuesi i emisionit Blendi Fevziu se si kanë qenë ato 11 muaj për të, kryedemokrati u përgjigj:
“Vërtet arrest shtëpie, por në disa aspekte po të keni parasysh kushtet, unë isha brenda 4 mureve. Pa një oborr dhe pa një të drejtë lirie, që përcaktohet në çdo paraburgim në çdo shtet të botës, përveçse në atë që urdhëron Edi Rama. Natyrisht privimi i lirisë është akti më i rëndë për një njeri para ekzekutimit të tij.”
Nuk mund të mos kujtojmë videot virale të Berishës në tarracën e shtëpisë së tij. Për të, ecja është element thelbësor i përditshmërisë.
Ai shtoi se edhe kontaktet i ka pasur të reduktuara, pasi GJKKO i lejonte të takohej vetëm me familjarët e ngushtë.
“Po avoketërit?! Kjo s’ndodh në asnjë diktaturë, ti s’mund të paraburgosësh një njeri pa pasur avokatin”, tha Berisha.
Kujtojmë se masa e “arrestit në shtëpi” ndaj ish-kryeministrit erdhi në kuadër të hetimeve për ish-klubin sportiv “Partizani”.
