Policia ka zbritur në terren ditën e sotme thuajse në gjithë bregdetin e vendit për të vepruar ndaj atyre që nuk po i përgjigjen ultimatumit të kryeministrit Rama për zaptimin e rërës së plazhit.
Nëpërmjet njoftimit të policisë 3 subjekte pa leje janë evidentuar në Seman të Divjakës dhe janë hequr plot 157 shezlongë dhe rreth 76 çadra.
Ndërkohë më parë Policia ka qenë edhe në plazhin e Golemit e të Durrësit ku dhe aty ka spastruar hapësirën bregdetare nga shezlongët e subjektet pa leje.
NJOFTIMI NGA POLICIA
Seman, Darzezë, Divjakë
Në kuadër të operacionit “Bregdeti ynë”, nis faza e dytë e operacionit për lirimin e hapsirave bregdetare të zaptuara në mënyrë të kundraligjshme me shezlongë e çadra.
Në zbatim të planit operacional të hartuar nga Drejtoria e Përgjithshme e Policisë së Shtetit “Për kontrollin e vijës bregdetare në drejtim të zaptimit të vijës bregdetare nga subjekte apo persona të cilët nuk janë konfirmuar nga e-Albania”, Task-Forca e veçantë në përbërje të së cilës ka 2 grupe FNSH, shërbime të Komisariatit të Policisë Fier dhe Divjakë, Policia Bashkiake, Inspektoriati i Territorit të kontrollit dhe zyra e Tatimeve të Bashkisë Fier, prej mëngjesit të sotëm ka nisur kontrollet dhe verifikimet në territorin e plazhit në Seman, Darzezë dhe Divjakë.
Si rezultat i kontrolleve deri tani janë evidentuar 3 subjekte në Darzezë dhe Seman pa leje ku janë hequr 157 shezlongë dhe rreth 76 çadra.
Operacioni vijon pa probleme.
