Pas 10 muajsh, është arrestuar në Shkodër 21 vjeçari i kërkuar nga policia për transport të paligjshëm emigrantësh.
Më 4 Mars të këtij viti, i riu tentoi të kalonte në pikën kufitare të Morinës 18 emigrantë sirianë.
Sapo pikasi forcat policore, ai braktisi furgonin dhe ia doli të shpëtonte, megjithatë Gjykata e Kukësit i ka caktuar masën e “arrestit me burg”.
“Në muajin mars 2023, braktisi automjetin me të cilin transportonte në aksin rrugor “Tuneli-Morinë”, 18 sirianë, kapet dhe vihet në pranga 21-vjeçari i shpallur në kërkim. Si rezultat i informacioneve të siguruara nga inteligjenca policore, si dhe i shkëmbimit të tyre me strukturat e Policisë së Kukësit, Komisariati i Policisë Shkodër, në bashkëpunim me Seksionin për Hetimin e Trafiqeve e DVP Shkodër, lokalizoi në Shkodër, kapi dhe vuri në pranga shtetasin F. L., 21 vjeç. 21-vjeçari, me masë sigurie “Arrest në burg”, caktuar nga Gjykata e Kukësit, për veprën penale “Ndihma për kalim të paligjshëm të kufijve”, u shpall në kërkim në muajin mars të vitit 2023, në kuadër të operacionit “Kalimashi”, sepse braktisi automjetin me të cilin u konstatua duke transportuar në aksin rrugor “Tuneli-Morinë”, 18 emigrantë nga Siria, të cilët synonin të kalonin ilegalisht, kufijtë”, njofton Policia.
