Ish-kryeministri Sali Berisha, denoncoi dje në Facebook një atentat që sipas tij i ishte bërë djalit të deputetit Spartak Braho në Durrës. Pas kësaj ngjarje sipas Berishës, deputeti bashkë me të birin kanë takuar prindërit e personave me të cilët ishte konfliktuar Arber Braho për sqarim.
Burime nga policia konfirmojnë konfliktin por ato bëjnë me dije se nuk kemi të bëjmë me një atentat por me një konflikt për motive të dobëta. Sherri ka nisur për shkak të një vendi parkimi në pallatin ku banon Kreshnik Braho. Një person i quajtur Lajden Kadilli, së bashku me të atin kanë kërcënuar me armë zjarri djalin e deputetit Braho. Mësohet se gjithashtu ata kanë qëlluar me qytën e automatikut makinën ku ndodhej Kreshnik Braho i cili ishte larguar me shpejtësi.
Policia sqaron se ishte proceduar penalisht djali tjetër i deputetit socialist, Arbër Braho, pasi kishte goditur me sende të forta këta dy shtetas. 26-vjeçari Kadilli është aktualisht i shpallur në kërkim nga policia. Ai rezulton me precedentë penalë në të shkuarën.
Në lidhje me këtë ngjarje reagoi fillimisht djali i Spartak Brahos, Arber Braho i cili tha se ngjarja është shtrembëruar dhe se ai me të atin nuk kishin takuar askënd në asnjë lokal. Deputeti Braho gjithashtu reagoi për denoncimin e Berishës duke thënë: “Një shpifje e zakonshme e qofte largut se unë jam takuar për sqarim me personat në fjalë. Denoncimi ndaj personit, që ka 7 vjet në kërkim për provokimin e bërë, ju bë organeve të policisë së shtetit”, përfundon Spartak Braho. /Opinion.al
