Numri dy i qeverisë Erion Braçe ka ironizuar protestën e opozitës. Duke folur përpara Parlamentit, që mbahet i rrethuar nga 1000 forca policie, Braçe tha se situata është krejt normale.
“Ne këtu mirë jemi. Mendoj që situata është krejt normale, kështu që kam përshtypjen jemi në kushte krejt normale. Kush ka arsye të protestojë le të protestojë, kush ka arsye të punojë do të punojë.”
Ai i është përgjigjur edhe Presidentit Ilir Meta, i cili ftoi palët të bënin hapa pas në qëndrimet e tyre dhe të dialogonin.
“Pa cenuar parimet e demokracisë. E para nuk heqim dorë nga demokracia, nga Kushtetuta dhe nga parimet kushtetuese që kanë të bëjnë me legjitimitetin e institucioneve. Për të dialoguar, për të dhënë garanci, ne kemi qenë gati, jemi gati prapë tani dhe të flasim për garancitë. Edhe ndryshime në Kodin Penal po të duan, për të forcuar masat kundër blerjes së votës, që do të na shërbejë edhe ne. Unë po e them sot, ne kemi qenë viktima, të paktën në dy qarqet, në Fier dhe Elbasan, të blerjes së votës”, ka thënë Braçe.
Por qeverinë tranzitore, ka thënë ai, opozita as duhet ta mendojë.
“Qeveri tranzitore, as që bëhet fjalë, as që diskutohet për këtë gjë. I bie të heqim dorë nga demokracia. Zgjedhjet që po kundërshton opozita, u bënë me një qeveri ku funksionet kyçe i ka pasur Partia Demokratike. Tani për çfarë të flasim?”, tha Braçe./Opinion.al
