Zviceranët kanë kritikuar këngën zyrtare me të cilën do të përfaqësohet kombëtarja e tyre në Botërorin që do të luhet verën e këtij viti në Rusi.
Kënga e titulluar ‘Ole Ole’ e DJ Antoine ka shkaktuar shumë debatë tek shumë qytetarë, ku ndërkohë ata mendojnë kënga se nuk ka lidhje me futbollin, pasi ajo nxit konsumimin e alkoolit dhe flet më tepër për seksin, raportojnë mediat zvicerane.
Ndërkohë zëdhënësi i Federatës Zvicerane, Marco von Ah ka thënë se kënga është pranuar edhe nga iTunes, pasi është klasifikuar si e padëmshme për të miturit.
“Nuk duhet që ta mbivlerësojmë tekstin por as t’a trajtojmë fjalë për fjalë. Natyrisht, nuk do të pranonim thirrje për konsumin e alkoolit por kënga ka të bëjë më shumë për dehjen për lumturi, flet për pasionin dhe dashurinë për jetën. Në fund audienca do të vendosë nëse e pëlqen apo jo?” ka shtuar më tej Marco von Ah.
Federata ka njoftuar se kënga do promovohet për herë të parë në ndeshjen miqësore që Zvicra do të luajë ndaj Japonisë në Lugano më 8 qershor.
