Kur duhen edhe më pak se një muaj nga fillimi i Botërorit ‘Rusi 2018’, rreth 86% e hoteleve në Moskë janë prenotuar nga tifozët e shumtë që kanë vendosur të shohin kombëtaret e tyre në stadium.
Sipas autoriteteve ruse pritet që në kryeqytetin rus të vijnë më shumë se 1 milionë tifozë nga e gjithë bota.
‘Rreth 86% të ambienteve të 1300 hoteleve në Moskë janë prenotuar për periudhën e Kupës së Botës’, deklaroi Nikolay Gulyaev, drejtues i Departamentit të qytetit të Moskës për Sportin dhe Turizmin.
Argjentina, Gjermania, Portugalia, Brazili dhe Franca do të luajnë të paktën nga një ndeshje në dy stadiumet që ndodhen në Moskë, ku në stadiumin ‘Spartak’ do të zhvillohen 5 takime, kurse në stadiumin tjetër ‘Luzhniki’ do të zhvillohen edhe 7 ndeshjet e tjera.
Botërori ‘Rusi 2018’ do të nisë në 14 qershor dhe do të përfundojë në 15 korrik.
