Trajneri i Manchester United, Jose Mourinho mendon se Portugalia është skuadra favorite për të fituar Botërorin që do të luhet këtë vit në Rusi, pasi ka një futbollist si Cristiano Ronaldo.
“Portugalia ka një skuadër interesante. Pa Cristiano-n do të ishte e pamundur. Por me të, asgjë nuk është e pamundur” ka thënë Mourinho.
Por gjithashtu trajneri portugez beson se ekipi tjetër që mund të fitojë Botërorin është Argjentina, pasi edhe ajo ka në ekip një lojtar të madh si Lionel Messi.
“Unë besoj se kombëtarja argjentinase pa Messi-n nuk do të ishte kandidate për ta fituar botërorin. Por me të, ata janë një nga favoritet” ka shtuar më tej portugezi.
Nga ana tjetër vlerëson edhe Brazilin me Spanjën.
“Më pëlqen struktura bazë e Brazilit, taktika dhe mentaliteti i tyre. Ka një përzierje ndërmjet talentit natyral të Brazilit, me një qasje serioze fizike dhe taktike.
Janë një skuadër e aftë që të mbrojnë mirë, pësojnë pak gola dhe kanë lojtarë të zotë ku të mbështeten. Pastaj në sulm kanë emra si Willian, Neymar, Coutinho dhe Gabriel Jesus…të gjithë këta lojtarë kanë cilësi të jashtëzakonshme.
Pastaj kemi ekipet tradicionale të Evropës, por unë mendoj se Spanja sërish ngelet një ekip i madh. Aty janë mbledhur futbollistë më të njëjtën filozofi loje, të përshtatur për të luajtur atë stil loje” ka përfunduar deklaratën e tij trajneri i Manchester United.
