Në prag të nisjes së Kupës së Botës, Presidenti i FIFA-s, Gianni Infantino në një fjalim të mbajtur ka akuzuar Perëndimin për “hipokrizi”.
Në një monolog të jashtëzakonshëm në një konferencë shtypi në Doha, Infantino foli për gati një orë dhe bëri një mbrojtje pasionante të Katarit dhe turneut.
Kupa e Botës është lënë në hije për shkak të disa çështjeve të Katarit, duke përfshirë vdekjen e punëtorëve emigrantë dhe trajtimin e personave LGBT.
Infantino, i cili ka lindur në Zvicër, tha se kombet evropiane duhet të kërkojnë falje për aktet e kryera në historitë e tyre, në vend që të fokusohen në çështjet e punëtorëve emigrantë në Katar.
Ai hapi fjalimin duke thënë: “Sot kam ndjenja të forta. Sot ndihem nga Katari, ndihem arab, ndihem afrikan, ndihem homoseksual, ndihem i paaftë, ndihem punëtor emigrant”.
Në shkurt 2021, The Guardian tha se 6,500 punëtorë migrantë nga India, Pakistani, Nepali, Bangladeshi dhe Sri Lanka kishin vdekur në Katar në punimet për ndërtimin e stadiumeve.
Numri bazohet në shifrat e dhëna nga ambasadat e vendeve në Katar.
Megjithatë, qeveria e Katarit tha se jo të gjitha vdekjet e regjistruara ishin të njerëzve që punonin në projekte të lidhura me Kupën e Botës.
Qeveria tha se të dhënat e saj të aksidenteve treguan se kishte 37 vdekje midis punëtorëve në vendet ku po nderoheshin stadiumet për Kupën e Botës midis 2014 dhe 2020, vetëm tre prej të cilave ishin “të lidhura me punën”.
Infantino tha: “Na janë mësuar shumë mësime nga evropianët dhe bota perëndimore. Unë jam evropian. Për atë që kemi bërë për 3000 vjet në mbarë botën, ne duhet të kërkojmë falje për 3000 vitet e ardhshme përpara se të japim mësime morale”.
“Nëse Evropa interesohet vërtet për fatin e këtyre njerëzve, ata mund të krijojnë kanale ligjore – siç bëri Katari – ku një numër i këtyre punëtorëve mund të vijnë në Evropë për të punuar. Jepuni atyre një të ardhme, pak shpresë”.
