Bota është duke u përballur me mungesa por edhe rritje të çmimeve të produkteve të shportës, për shkak të bllokimit të eksporteve nga portet e Ukrainës.
Por, pavarësisht se e gjithë bota i trembet krizës, kryeministri Edi Rama, duke cituar një raport të shtatorit të Bankës Botërore, sjell në vëmendje se Shqipëria është vendi me nivelin e inflacionit më të ulët mbi çmimet e produkteve ushqimore.
Kreu i qeverisë thotë se rritja e çmimeve në Shqipëri është thuajse sa gjysma e rritjes së raportuar në pothuaj të gjithë vendet e rajonit. Sipas Ramës, arsyeja që inflacioni, sipas tij, nuk po bën në Shqipëri atë që po bën në rajon është, siç shprehet ai, mburoja financiare e qeverisë mbi çmimin e energjisë.
“Sipas raportit të shtatorit të Bankës Botërore @Worldbank për Sigurinë Ushqimore, në analizën e efekteve të luftës mbi çmimet në produktet ushqimore dhe gjendjen e prodhimit/furnizimit, Shqipëria rezulton me nivelin e inflacionit më të ulët mbi çmimet e produkteve ushqimore, krahasuar me vendet e rajonit. Rritja e çmimeve në Shqipëri është thuajse sa gjysma e rritjes së raportuar në pothuaj të gjithë vendet e rajonit. Arsyeja themelore e frenimit të galopit të inflacionit në vendin tonë është mburoja financiare e qeverisë mbi çmimin e energjisë, i cili mbahet i paprekur nga rritja si rezultat i kompensimit masiv nga buxheti i shtetit.”-shkruan Rama./ Opinion.al
