Teksa, bota po i afrohet me hapa të shpejtë 8 miliardë banorëve, një nga sfidat më të mëdha të mijëvjeçarit të ri mbetet furnizimi me ushqim.
Potsdam Institute for Climate Impakt Research (PIK), institut kërkimor gjerman, ka botuar studimin e tij 5-vjeçar dhe sipas rezultateve aktualisht në planetin tonë vetëm 3.4 miliardë persona kanë mundësinë të ushqehen në mënyrë të balancuar me të paktën 2355 kilo kalori në ditë. Kjo do të thotë se më shumë se 60% e popullsisë botërore nuk ushqehet siç duhet.
Megjithatë studiuesit thonë se ka ende mundësi për të rritur në mënyrë të ndjeshme këtë bilanc. Duke u bazuar tek teoria e 9 limiteve planetare të gjeofizikantit suedez Johan Rockstrom, sipas tyre zgjidhja është kthimi në natyrë të tokave të kultivuara në zonat ku më shumë se 5% të specieve janë të rrezikuara, ripyllëzimi i tokave bujqësore aty ku më shumë se 85% e pyllit tropikal është prerë, si dhe zvogëlimi i ndjeshëm i azotit në fertilizuesit.
Në terma më konkrete, aktivitetet bujqësore duhet të braktisnin tokat tejet të shfrytëzuara në Kinë dhe në Europën qendrore, për t’ u spostuar në veriperëndimin e Shteteve të Bashkuara, ose në Afrikën subsahariane, që kanë ende tokë të pa helmuar nga shfrytëzimi i tepërt./Opinion.al
