Kryeministri britanik, Boris Xhonson ka thënë se do t’u japë deputetëve më shumë kohë për të debatuar mbi marrëveshjen e Brexit, nëse ata pranojnë të zhvillohen zgjedhjet e përgjithshme të parakohshme në 12 dhjetor.
Ndërsa Bashkimi Europian pritet të vendosë të premten për shtyrjen e afatit, Xhonson tha se pret që BE-ja të japë një zgjatje të afatit përtej 31 tetorit edhe pse ai “në të vërtetë” nuk e dëshironte atë.
Ai i kërkoi Laburistëve që të mbështesin zgjedhjet e parakohshme në një votim që ai planifikon të zhvillojë javën e ardhshme.
Nëse Brexit shtyhet deri në fund të nëntorit, Kryeministri do të përpiqet të kalojë marrëveshjen e tij përmes Parlamentit përsëri por nëse shtyrja do të jetë deri në fund të janarit, Xhonson do të kërkojë një votim javën tjetër për zgjedhje në 12 dhjetor të këtij viti.
Nëse Laburistët do të pajtohet me zgjedhjet, atëherë qeveria thotë se do të përpiqet të kalojë marrëveshjen e saj përpara se Parlamenti të shpërndahet për fushatë në 6 nëntor. /Opinion.al
