Protesta e studentëve që kërkojnë plotësimin e 8 pikave të kërkesave të tyre, vazhdon në disa fakultete. Studentët kanë zgjedhur si mënyrë bojkotin e mësimit, por edhe ngujimin nëpër auditore.
Mesditën e së enjtes studentë të Fakultetit të Drejtësisë janë mbledhur përpara parlamentit ku në mënyrë simbolike kanë djegur ligjin e arsimit të lartë. Më pas një pjesë e tyre i janë kthyer ngujimit, ku qëndrojnë me turne, ndërsa bojkoti i mësimit në fakultet vazhdon.
Në të njëjtën situatë është edhe Fakulteti i Historisë dhe Filologjisë ku mësimi nuk zhvillohet dhe ka studentë të ngujuar, ndërkohë që zyrat e sekretarive funksionojnë. Ne to jane afishuar edhe procedurat per bursat apo per pagesen e tarifave studentore. Ndërkohë, studentët u janë drejtuar me një kërkesë pedagoëve, duke ju kërkuar që të bashkohen me ta.
Sipas vetë studentëve, në Universitetin e Mjekësisë, fakulteti i Farmacisë dhe Stomatologjisë janë duke zhvilluar mësim, ndërkohë që në degët e tjera të këtij universiteti ka bojkot.
Në bojkot vazhdon të jetë edhe Fakulteti i Shkencave Sociale, ku studentët kanë marr zyrtarisht edhe mbështetjen e pedagogëve, që disa ditë më parë kanë dalë me një deklaratë përmes së cilëve kërkojnë ndër të tjerë abrogimin e ligjit për arsimin e lartë.
Ndërkohë, ndonëse kanë qenë në bojkot edhe sot studentët e fakultetit ekonomik na thonë se janë duke zhvilluar sondazhe, për shkak se një pjesë e studentëve kërkojnë rikthimin në mësim.
Gjatë ditës së sotme edhe Asambleja e Stafit Akademik të Fakultetit të Shkencave Politike, në Universitetin e Durrësit ka firmosur për shfuqizimin e ligjit për arsimin e lartë dhe mbështetjen e kërkesave të studentëve./ Opinion.al
