Ish-deputeti demokrat, Luçiano Boçi, ka reaguar pas deklaratës së ministrisë, e cila theksoi se pakti po ecën në rrugë të mbarë.
Me anë të një statusi në Facebook, Boçi shkruan se tarifat mbesin në kurriz të studentëve, teksa shton se në deklaratën informuese të Ministrisë, pranohet paturpësisht se tarifat e Bachelorit nuk do të përgjysmohen.
Ish-deputeti nënvizon se nuk ka rritje të buxhetit për arsimin dhe përgjysmimi i vjetshëm ishte thjesht loja momentale, për të fikur protestën studentore teksa nuk harron të paralajmërojë Ministrinë të përgatitet për përballjen e rradhës me protestën studentore.
Reagimi i plotë:
TARIFAT MBESIN…NË KURRIZ TË STUDENTËVE
Ministria e Arsimit, e cila e ka nxjerrë prej kohësh nga shinat Arsimin e lartë e jo vetëm atë (por dhe Akademinë, Arsimin parauniversitar, Kërkimin shkencor), në deklaratën e saj informuese, pranon paturpësisht atë që ne denoncuam për tarifat e pa përgjysmuara për Bachelor e të pa rishikuara për Master.
TARIFAT MBESIN, përcakton Ministria, duke sfiduar kështu publikisht kërkesën themelore të studentëve dhe duke shkelur me krenari prej budallai, zotimin brenda paktit.
TARIFAT MBESIN, sepse nuk ka rritje të buxhetit për arsimin, siç e kërkuan studentët dhe siç shkruante Pakti.
TARIFAT MBESIN, sepse Rama nuk vendosi për përgjysmim me VKM, sic e parashikin ligji, të shumës tavan për Universitetet.
Përgjysmimi i vjetshëm pra, ishte thjesht LOJA momentale, për të fikur protestën studentore.
Ministria mashtron, kur thotë se subvencionoi vjet 2.3 miliard lekë paketë financiare.
Lekët e vjetshme iu morën me dhunë universiteteve, duke i lënë pa investime, funksione e shërbime, sepse buxheti për arsimin e Lartë as u rishikua e as ndryshoi.
Ekselentët dhe familjet në nevojë janë mbështetur sistematikisht që para 2013 dhe këtu nuk ka asnjë risi nga Ministria.
Këto TARIFA TË MBETURA, do nxjerrin në mes të katër rrugëve mijëra maturantë në pamundësi ekonomike dhe do detyrojnë të marrin rrugët e Europës e rajonit mijëra të tjerë.
Vetëm një fakt tronditës mjafton:
Vjet aplikuan për të ikur jashtë Shqipërisë gati 9 mijë maturantë.
Sivjet numri i tyre ka kapur shifrën 11 mijë. Pra 2 mijë më shumë. Kjo sepse një Bachelor+Master kushton më shumë në Shqipëri se Gjermani.
Gjendja e ambienteve universitare e konvikteve në tërësi, pavarësisht ndihmës gjermane, mbetet skandaloze dhe Universitetet nuk kanë mundësi financiare ndërhyrëse.
Ndërkohë, gama e përfitimeve për studentët që mbajnë kartën e studentit është krejt qesharake e tallëse.
Asnjë përfitim për qeranë, shpenzime për libra e mjete mësimore, apo për ushqim.
Në vend të tyre, me ironi studentit i shkruhet si favor: Hyn falas në bibliotekën e lagjes!!!!!
Bordet vazhdojnë të dominohen nga Ministria dhe studentët nuk kanë rol vendimmarrës.
Ndërsa loja e pisët me pedagogët, për t’i vënë kundër studentëve e anasjelltas, u demaskua me emërimet e atyre që akuzohen për plagjiaturë, në postet drejtuese të PS dhe pushtetit lokal.
Ministria e Arsimit do bënte mirë që sot të heshte dhe të përgatitet për përballjen e rradhës me protestën studentore.
