Deputeti Ben Blushi tha gjatë fjalimit të mbajtur sot në Parlament se në 1 mijë ditë qeverisje, Rama në 100 ditë ka bërë selfie, 200 ditë i ka kaluar në avion, 300 ditë në stadium dhe 400 ditë në burg.
Por në çështjen e fundit ai është ndalur gjatë teksa tha se kreu i qeverisë futi në burg ata që nuk paguanin dot energjinë, ndërkohë që nxorri nga burgu deputetët që kanë vrarë dhe kanë përdhunuar.
Megjithatë sipas Blushit, Rama do të mbajë një premtim në këto katër vjet, nuk do ta fusë Ilir Metën në burg. “Edi Rama nuk bëri vetëm kaq, kur u mor me burgjet 400 ditë. Me bindjen se burgu i shërben për të nxitur reformat, ai ka arritur të bindë edhe një njeri që nuk e ka në plan përkohësisht ta fusë në burg. Ky njeri është Ilir Meta. Këtë premtim besoj se Edi Rama do ta mbajë deri në zgjedhjet e ardhshme. Deri ditën kur Rilindja do hyjë në zgjedhje. Megjithatë ky nuk është më problemi im”, tha deputeti Blushi.
