Kryetari i LIBRA-s, Ben Blushi ka akuzuar palët politike se nuk kanë vullnet për të hapur dosjet. Nga foltorja e Kuvendit, deputeti Blushi, vuri në dyshim edhe kandidaturat e propozuara për Autoritetin e Informimit për Dosjet e Sigurimit, duke i cilësuar një përzgjedhje tërësisht politike.
”Dy palët në parlament nuk kanë asnjë vullnet për të hapur dosjet. E interpretuar si kapital për të ndëshkuar kundërshtrarin. Ju pyes sot dhe një herë: A do hapen dosjet? Lexova ligjin, i jep të drejtën Autoritetit për të qenë selektiv, për të hapur dosje për disa dhe për të mbyllur dosje për disa. Kjo ishte kundërshtia mes palëve dhe këtu në Kuvend. Nuk duam të merrem personalisht me njerëzit e propozuar por nuk kanë asnjë autoritet, duhet të ishin historianë. Tre prej tyre janë burokratë. Nuk po ndërtojmë biblikotekë, ku shkon secili dhe merr librin e vetë. Kështu duhet të ishte. Kjo ishte e vetmja mundësi ku kjo klasë politike mund ti jepte një akuzë pas 25 vitesh. Kjo është një përzgjedhje totalisht politike” tha Blushi.
Ndër të tjera, ai tha se ky shtet ka një raport shumë të keq prej 100 vitesh me dokumentat publikë. Blushi bëri me dije se në lidhje me këtë ide, po ju jap dy raste, për mënyrë se si i trajtojmë njerëzit kur vjen puna për të marrë dokumentin që u takon.
“Është zgjedhur para dy vitesh një zonjë që quhet Avokate e e Shtetit. Ju drejtova para një muaji kësaj zonje për të marrë një dokument, akoma nuk më ka dhënë përgjigje, jam deputet. Ka mundësi ta kem votuar, nuk e mbaj mend. Imagjino një njeri të thjeshtë. Kërkova një letër që e kam firmosur vetë, nuk ma jep se nuk jam rilindas. Nuk besoj se Autoriteti do të bëjë transparencë për shqiptarët”, tha ai.
Ndërkaq, Blushi është ndalur më tutje edhe në një rast tjetër, ku ka treguar se asnjë dokument shtetëror në Shqipëri nuk ruhet, nuk konservohet. Ai tha se mësuesja e tij e letërsisë e ikur në emigracion, vjen para tre muajsh duke qarë: Kam 20 vite në emigracion dhe nuk më ka dhënë sigurimet shoqërore.
Sipas tij, ajo ka mësuar kushedi sa breza, por shteti shqiptar, nuk ja njeh punën deri në ’91. Blushi theksoi se u interesova, u kërkova institucioneve përkatëse t’ia jepnin dëshminë, por ata ende nuk e kanë gjetur. “Është zhdukur”, deklaroi deputeti në Kuvend.
