Kryetari i Bashkisë së Durrësit Vangjush Dako ka reaguar për herë të parë ndaj problemit të ngritur nga ana e pushuesve kosovarë që nuk lejohen të hyjnë në rrugën “Pavarësia”. Dako tha se 90% e të gjithë pushuesve që frekuentojnë plazhet në Durrës janë nga Kosova dhe ndaj tyre nuk mund të bëhet diskriminim por ndalimi i autobusëve përmes rrugës kryesore është bërë të disiplinuar trafikun. Ai tha se Bashkia dhe Policia Rrugore nuk do të tërhiqen nga ky rregull dhe sugjeroi rrugët e tjera që duhen ndjekur nga shoferët e autobusëve për të mbërritur në plazh.
“Autobusët me pushues nga Kosova nuk do të lejohen të kalojnë në këtë rrugë, por në funksion të tyre janë pesë rrugë paralele për t’u futur në plazhin e Durrësit. Prej pushuesve nga Kosova kërkojmë mirëkuptim të tyre. Gjithçka bëhet për të disiplinuar trafikun e rënduar në këtë zonë, dhe për faktin që gjysma e rrugës “Pavarësia” është kthyer në pedonale për vetë pushuesit”, tha Vangjush Dako në një prononcim i pyetur nga mediat për këtë çështje.
Përjashtim nga ky vendim është bërë për autobusët me turistë të huaj që janë të prenotuar nga hotelet në plazhin e Durrësit dhe janë lejuar të hyjnë në kundërshtim me tabelat e vendosura për qarkullimin rrugor, tha kreu më tej kreu i bashkisë së Durrësit.
Moslejimi i pushuesve nga Kosova të hyjnë në plazhin e Durrësit ka shkaktuar një valë zemërimi në bregdetin Adriatik tek të gjithë operatorët turistikë, dhe te pushuesit në këtë anë e në pjesën e Kosovës, aq sa pushuesit nga Kosova, thanë se nuk do të vijnë më vitin tjetër në Durrës.
