TIRANË- Një ngjarje e paprecedent ka ndodhur në Rinas. Një shtetas shqiptar i dënuar për një seri veprash penale mes tyre edhe vrasje me dashje ka arritur të arratiset. Policia dha versionin e saj vetëm pasi rasti u bë publik në media.
Le ti referohemi komunikatës së policisë për të mësuar çfarë ka ndodhur. “Dje rreth orës 14:00 Arnolt Canametit, 20 vjeç, nga Burreli, i shpallur në kërkim për veprën penale “Vrasje me dashje e mbetur në tentativë”, “Prodhim dhe mbajtje pa leje të armëve të ftohta dhe të zjarrit”, “Shkatërrim prone” dhe “Prishje e qetësisë publike” ka mbërritur në Rinas si i deportuar nga Franca”.
“Por autoritetet shqiptare policore nuk kanë patur dijeni paraprake për kthimin e tij me avion. Gjatë shoqërimit të të deportuarve nga avioni në drejtim të godinës së përpunimimit të shtetasve, pikërisht kur ka zbritur nga mjeti transportues, duke përfituar nga mungesa e vëmendjes së shërbimeve të policisë, Canameti ka mundur të largohet në drejtim të daljes nga rrethimi i aeroportit”, thuhet në komunikatë.
Dy personat që e kanë pritur në Rinas dhe e kanë ndihmuar të largohet Murat Hysa, 50 vjeçdhe Ylber Ndoi të dy nga Burreli janë arrestuar. Ndërsa Canameti është shpallur në kërkim. Paralelisht po heton edhe SHKB-ja për këtë ngjarje.
