Sekretari amerikan i Shtetit, Anthony Blinken do të udhëtojë sot në Turqi për një vizitë zyrtare. Gjatë vizitës, Blinken do të zhvilloje bisedime mbi mënyrat sesi Uashingtoni mund të ndihmojë më tej Ankaranë në tentativat për t’u përballur me pasojat e tërmetit shkatërrues që goditi vendin.
Tërmeti me magnitudë 7.8 që goditi Turqinë juglindore dhe Sirinë fqinje më 6 shkurt u mori jetën më shumë se 46,000 njerëzve dhe la mbi një milion njerëz të pastrehë së bashku me një kosto ekonomike që pritet të arrijë në miliarda dollarë.
Në agjendën e bisedimeve që do të zhvillojë Sekretari amerikan i Shtetit në Turqi pritet të dominojë edhe çështja e zvarritjes së kandidaturave të Suedisë dhe Finlandës për anëtarësim në NATO, të cilën Turqia deri tani ka refuzuar ta ratifikojë.
Ankaraja ka lënë të kuptohet së fundmi se do të miratojë vetëm anëtarësimin e Finlandës në organizmin ndërkombëtar.
Ditën e sotme Blinken pritet që të vizitojë me helikopterin e tij zonat e goditura më rëndë dhe më pas të hënën do të ketë bisedime dypalëshe me homologun e tij turk Mevlut Çavusoglu.
Sekretari amerikan i shtetit pritet të takohet edhe me presidentin turk Rexhep Erdogan.
Pas tërmetit, SHBA dërgoi një ekip kërkimi dhe shpëtimi, furnizime mjekësore dhe mjete për thyerjen e betonit dhe një fond shtesë prej 85 milionë dollarësh në ndihmë humanitare në Turqi, e cila mbulon gjithashtu Sirinë.
