Antony Blinken është konfirmuar në postin e sekretarit të Shtetit. Pro emërimit të tij në këtë detyrë votuan 78 senatorë ndërsa 22, votuan kundër, transmeton VOA.
Në një seancë konfirmimi javën e kaluar, Blinken është shprehur se ai është i gatshëm të përballet me sfidat e paraqitura nga Kina, Irani, Rusia dhe Koreja e Veriut. Ai tha se Kina “paraqet sfidën më të rëndësishme” për interesat kombëtare të SHBA, ndërsa vuri në dukje se ka vend për bashkëpunim.
“Ekzistojnë aspekte kundërshtuese në rritje të marrëdhënies; sigurisht, ato konkurruese, dhe akoma disa bashkëpunuese, kur është në interesin tonë të përbashkët“, shtoi Blinken. Ndër të tjera ai u zotua të rindërtojë moralin e Departamentit të Shtetit dhe trupën diplomatike.
Blinken ka mbajtur më herët postin e zëvendës sekretarit të shtetit gjatë administratës së Obamës dhe ka lidhje të ngushta me Presidentin Joe Biden.
Ai ka qenë gjithashtu drejtor i stafit për Komitetin e Marrëdhënieve të Jashtme të Senatit kur Biden ishte kryetar i panelit, dhe më vonë ishte këshilltari i Sigurisë Kombëtare i Zëvendës Presidentit Biden. Komiteti i Marrëdhënieve me Jashtë miratoi emërimin e Blinken me një votim 15-3, duke e dërguar çështjen në Senatin e plotë për aprovim përfundimtar./Opinion.al
