Pasditen e së dielës, u përcollën për në banesën e fundit, dy vëllezërit Bilali që u ekzekutuan një ditë më parë në qytetin e Shkodrës. Qyteti është blinduar nga forcat e policisë pasi në ceremoninë mortore mori pjesë edhe Asmer Bilali, djali dhe nipi i viktimave, i cili është në paraburgim si një nga anëtarët e grupit “Bajri”.
Fahri Vejuka, gjyshi i tij, teksa foli për mediat tha se shpreson që autori të gjejë autorët, sepse thuajse është shuar një familje. Ai bëri gjithashtu apel që nipi i tij të qëndronte së paku dy ditë në shtëpi sepse duhej të priste njerëzit.
“Shpresojmë që shteti të gjejë autorët e vrasjes, sepse është një ngjarje shumë e rëndë që ka ndodhur. Pothuajse është shuar një familje, pas kësaj ngjarjeje dhe institucionet do të bëjnë detyrën e tyre për çfarë ka ndodhur. Asmer Bilali është djali i Astrit Bilalit dhe Asmeri është në burg prej disa muajsh. Ai do të jetë vetëm në varrim por ne kërkojmë që të lihet të paktën dy ditë tek banesa e tij për të pritur njerëzit sepse nuk ka askënd.” tha ai, duke shtuar se i vëllai 23 vjeç ishte i sëmurë.
Asmer Bilali është ish-kampion boksi që u arrestua si pjesë e grupit “Bajri” në ndërhyrjen e datës 6 shtator në Shkodër dhe që dyshohet se ishte edhe shënjestra e atentatit ku u vra Ferracaku hipur mbi kalë.
Ai njihet edhe si person me precedentë penalë të mëparshëm në policinë e Shkodrës, si dhe është i dyshuari kryesor për plagosjen e Hermes Beqirit në një nga lokalet e qytetit. Për ngjarjen e ndodhur në vitin 2017, Asmer Bilali u arrestua në fshatin Grudë ku ishte larguar me motorin e tij për t’ju fshehur policisë. Atij iu gjet edhe një armë tip pistoletë që mendohet se është përdorur për kryerjen e krimit./Opinion.al
