Në këtë luginë në fshatin Karaburun të Izmirit gjendet ky park kosheresh me bletë. E ka ngritur bletari Hysejin Xhejlan banor i kësaj zone.
Ai vjen nga një familje bletarësh, ndërsa merret me këtë profesion prej 30 vitesh. Bletët nuk i mbarështon vetëm për mjaltin apo produkte të tjera, por i përdor edhe për apiterapi.
Kjo e fundit është një mënyrë e mjekësisë alternative që përdoret për shërimin e disa sëmundjeve. Ai thotë se ka bërë edhe studime në këtë drejtim. Ka përfunduar Universitetin Bujqësor dhe prej gati 15 vitesh tashmë bën edhe kërkime për apiterapinë.
Kohët e fundit, interesi nga qytetarët për këtë metodë është i lartë. Ata vijnë vazhdimisht këtu për t’u trajtuar për semundje të ndryshme, nga alergjitë e deri te migrena.
Një seancë zgjat 15 minuta. Personat hyjnë në këto kabina dhe thithin ajrin nga tri koshere të ndryshme.
Marrin përmes ajrit më të mirën e bletës dhe produkteve të tjera apikulturore si mjalti, propolis, pioleni apo qumështi i bletës.
Vizitorët qëndrojnë këtu disa ditë dhe veç trajtimit kanë të përfshirë edhe akomodimin dhe ushqimin, duke paguar 5 mijë lira turke ose rreth 130 Dollarë.
Në këtë zonë trajtimi me këtë terapi bëhet edhe më efikas për shkak të gjelbërimit dhe natyrës.
Kjo terapi nuk njihet zyrtarisht nga autoritetet turke. Megjithatë zyrtarët vendas shprehin interes vazhdimisht për këtë park.
Këtu vijnë persona me histori të ndryshme. Senaj Ilham, 68 vjeçe, ka ardhur këtu për një vizitë një javore.
Ajo ka kaluar tumorin e gjirit dhe i është dashur t’u nënshtrohet disa ndërhyrjeve. Ja kanë sugjeruar apiterapinë dhe ka ardhur këtu për ta provuar.
Vizitorë të tjerë theksojnë veçanërisht natyrën dhe e kanë zgjedhur qëndrimin këtu për t’u relaksuar.
Turqia nuk është i vetmi shtet ku apiterapia ka gjetur terren. Një metodë e tillë e mjekësisë alternative përdoret edhe në Gjermani apo vende të tjera.
Klan News
