Prokuroria nis hetimet për blerjen e votave gjatë zgjedhjeve vendore në Dibër. Zyra e shtypit pranë kryeprokurorit Adriatik Llalla konfirmon nisjen e hetimeve me iniciativë nga prokuroria e Dibrës, për akuzën “dhënies së shpërblimeve dhe premtimeve” për blerjen e votave.
Ky hetim, nis pas transmetimeve në media, në emisione të ndryshme televizive të pamjeve filmike me zë dhe figurë ku individ të ndryshëm janë filmuar duke pranuar se janë paguar për dhënien e votës kandidatit të majtë Muharrem Rama.
Sipas këtyre burimeve, regjistrimi i procedimit penal është pa emra të personave konkret por me vepër penale, e cila parashikon një dënim të vetëm me gjobë.
Burimet thonë se me nisjen e hetimeve, prokruioria ka kërkuar nga televizionet e kombëtare e lokale, sekuestrimin e pamjeve filmike të regjistruara dhe transmetuara në mediat e tyre.
Pamje këto që tregojnë persona të ndryshëm, të cilët japin dhe premtojnë para e vende pune për të votuar në favor të kandidatit të majt, Muharrem Rama i cili paraprakisht është shpallur fitues i zgjedhjeve lokale në Dibër.
Sipas akuzës, me sekeustrimin e këtyre pamjeve dhe identifikimin e personave që kanë ofruar dhe premtuar para, do të merren në pyetje për llogari të kësaj dosje.
Në pamjet filmike të transmetuara nga televizione të ndryshme dhe emisione investigative, janë fiksuar nga kamera edhe vëllezërit e kandidatit të majtë, tashmë i shpalluur fitues Muharrem Rama të cilët premtojnë për vende pune.
Veç këtyre, edhe persona të tjerë zyrtarë të institucioneve vendore dhe qendrore janë regjistruar duke shpërndarë para. Nga ana tjetër, prokuroria thotë se do të sekuestrojmë edhe pamjet filmike, deklaratat dhe provat e ndryshme të publikuara nga subjekti i Partisë Demokratike për zgjedhjet lokale në Dibër, që u mbajtën më 11 shtator, ku fitues doli kandidati i koalicionit të majtë.
