Këshilli i Europës ka kërkuar dialogun si zgjidhje për konfliktin politik në Bjellorusi, por pas mbledhjes, kancelarja Merkel ka përjashtuar mundësinë se ajo vetë mund të jetë ndërmjetëse e një dialogu.
Këshilli i Europës ka diskutuar të mërkurën në një video konference, situatën e krijuar në Bjellorusi pas zgjedhjeve të 9 gushtit. Në deklaratën për shtyp, thuhet se Bashkimi Europian ka ndjekur me shqetësim zhvillimet në Bjellorusi dhe duke qenë se zgjedhjet e 9 Gushtit nuk kanë qenë të lira e të ndershme, nuk do të njohë rezultatin e tyre.
Në deklaratën e tyre, anëtarët e Këshillit të Europës u kanë bërë thirrje autoriteteve bjelloruse të gjejnë një mënyrë për të nxjerrë vendin nga kriza, duke i dhënë fund dhunës dhe duke përfshirë dialogun kombëtar, ku duhet të marrin pjesë të gjitha partië.
Në këtë kontekst, Këshilli ka mbështetur propozimin e OSBE-së, kryesuar nga Shqipëria për të negociuar dialogun mes palëve politike. Dy ditë më parë, OSBE njoftoi se një ofertë zyrtare ishte paraqitur në qeverinë e Bjellorusisë për një vizitë nga Kryetari i Zyrës së OSBE-së, Kryeministri dhe Ministri për Evropën dhe Punët e Jashtme të Shqipërisë, Edi Rama, dhe Kryetari i ardhshëm i OSBE-së, Ministri i Punëve të Jashtme të Suedisë, Ann Linde, për një takim me qeverinë dhe përfaqësuesit e opozitës.
“Ne do të vazhdojmë të ndjekim situatën nga afër dhe jemi të gatshëm të kontribuojmë në përpjekjet për t’i dhënë fund krizës në mënyrë paqësore. BE mbështet plotësisht propozimin e OSBE për dialog në Bjellorusi dhe është e gatshme të ofrojë ndihmë të mëtejshme”, thuhet në deklaratën e Këshillit të Europës.
Por ndërkohë, kancelarja gjermane Angela Merkel ka mohuar një rol të mundshëm si ndërmjetëse në çështjen e Bjellorusisë, shkruan Ansa.
Ajo tha se ka tentuar të kontaktojë në telefon liderin bjellorus Lukashenko, “por fatkeqësisht telefonata nuk është realizuar”.
Duke ju përgjigjur një pyetjeje specifike, kancelarja ka bërë të ditur se nuk e sheh të mundur një rol si ndërmjetëse. “Për të ndërmjetësuar duhet disponibiliteti i të dy palëve dhe Lukashenko e ka refuzuar takimin”, tha Merkel duke shtuar se BE kërkon të mbështesë shoqërinë civile.
“Për ne është e qartë që Bjellorusia duhet ta gjejë vetë rrugën e saj dhe nuk duhen ndërhyrje nga jashtë”, tha Angela Merkel në një konferencë për shtyp pas Këshillit të Europës./Opinion.al
