Policia italiane ka arrestuar gjatë mbrëmjes së djeshme një 30-vjeçar italian nga Mathi, i dyshuar për vrasjen e 43-vjeçarit shqiptar Fatmir Ara.
Shqiptari u gjet i vrarë të dielën e 4 Shtator në zonën e Vaude në San Carlo Canavese.
Autopsia zbuloi një ditë më parë se biznesmeni shqiptar u vra me të paktën 3 të shtëna arme në fytyrë.
Sipas mediave italiane deri tani nuk është e qartë nëse personi i arrestuar ka vepruar i vetëm apo ka pasur bashkëpunëtorë.
Fatmir Ara ishte zhdukur që nga e premtja. Pronar i firmës “Nuova Edile”, nuk ishte kthyer në shtëpinë e tij në Mathi, ku jetonte me partneren dhe dy fëmijët.Fatmir Ara ishte në arrest shtëpie dhe mund të dilte vetëm për punë.
Sakaq, hetimet janë fokusuar në të shkuarën e tij, pasi viktima ishte një person me precedent penalë. Autoritetet italiane nuk përjashtojnë asnjë pistë, veçanërisht atë të prishjes së pazareve të drogës dhe të larjeve të hesapeve.
