Xh.T., një emër i njohur në Durrës, është një nga biznesmenët që dyshohet se i është vendosur gjobë nga grupi i Emiljano Shullazit. Ai ka pasur precedentë penalë në Itali dhe Shqipëri në lidhje me trafikun e drogës.
I dëmtuari mendohet se ka informuar në rrugë jozyrtare Policinë dhe Prokurorinë, pasi zyrtarisht nuk rezulton të ketë bërë denoncim për gjobëvënie, ndaj Shullazit dhe as ndaj personave të tjerë. Në dhjetor 2006, ai është dënuar me 8 vjet burg për “trafik të lëndëve narkotike” nga gjykata shqiptare.
Më pas ai është përfshirë në disa procese gjyqësore për sekuestrimin e pasurisë nga Prokuroria e Krimeve të Rënda dhe Prokuroria e Durrësit. Xh.T. në momentin e arrestimit është kapur me 35 milionë lekë të rinj dhe qindramijëra euro në banesën e tij në Shkozet të Durrësit.
Në vitin 2006, Prokuroria e Krimeve të Rënda pati deklaruar se dosja ndaj T. kishte ardhur nga Italia. Dosja penale kishte ardhur me akuzat për trafik ndërkombëtar të drogës, ndërsa para kapjes së T., disa bashkëpunëtore të tij janë arrestuar ne Bari, me një sasi prej rreth 20 kg heroinë. Droga, siç pretendoi prokuroria në atë kohë, kalonte nga Turqia, Shqipëria dhe më pas në Itali.
Gjatë deklarimeve në Prokurori, biznesmeni nga Shkozeti tha se të hollat e gjetura i ka fituar nga shitja e dy peshkarexhave. Alibia e tij nuk u mor parasysh nga ana e Prokurorisë, që tha se alibia nuk ka qenë bindëse dhe se hetimet ndaj T. ishin shtrirë në një kohëzgjatje 3-vjeçare.
Mësohet se biznesmeni në fjalë nuk ka bërë kallëzim në Polici në lidhje me gjobëvënien. Në përfundim të procesit ndaj tij, Gjykata e Lartë hoqi sekuestron ndaj pasurisë së XH.T., ndërsa lirimi i tij nga burgu u bë ende pa përfunduar dënimin, me një amnisti të firmosur prej ish-presidentit të kohës, Bamir Topit, në prill 2010. /Panorama
