Rrugët e tyre janë krejtësisht të ndryshme! Por, në studion e “Opinion” në Tv Klan vëllezërit Duka i bën bashkë suksesi për më shumë se 30 vjet në fushën e tregtisë e sipërmarrjes.
Njëri është i apasionuar pas futbollit e tjetri pas politikës, por për Agron dhe Armand Dukën talenti dhe mençuria për të bërë biznes buronte njësoj.
Agron Duka me shumë objektivitet e sinqeritet dha në studio emrat e dy burrave shqiptarë që për të ishin biznesmenët më të suksesshëm. Të parin vendosi Zamir Manen e të dytin vëllain e tij Armand Dukën. Për të cilin, mes batutash tha se nëse nuk do të ishte marrë me Federatën e Futbollit do të kishte në xhepat e tij më shumë para.
“Unë e them me shumë sinqeritet dhe me shumë objektivitet. Për mua dy burra ka Shqipëria që janë biznesmenët më të suksesshëm dhe më të mençur është Zamir Mane dhe Armand Duka. Nëse Mondi nuk do të merrej shumë me Federatën do të kishte gjithë kohën e përkushtuar tek biznesi dhe do kishim pasur lekë më shumë, pot për mua më mirë që është marrë me futbollin. Më mirë sepse suksesi ka qenë për të gjithë nuk ka qenë vetëm për një biznesi”, tha Agron Duka.
