Shoqatat e biznesit deklarohen kundër aplikimit të taksës në Rrugën e Kombit.
Shoqata “Biznesi për Biznesin” organizoi sot takimin me fokus “Unifikimin e Qëndrimit për Taksën në Rrugën e Kombit, me mbështetjen e Kryetarëve të Bashkive Kukës, Has, Tropojë, përfaqësuesve të avokatit të popullit dhe deputetëve të zonës.
Në këtë takim, pas diskutimeve të shumta pjesëmarrësit dolën me një qëndrimin të përbashkët kundër aplikimit të kësaj takse, për arsyet e mëposhtme:
1- Ndërtimi i Rrugës së Kombit është bërë me fonde publike, jo me koncesion.
2- Mirëmbajtja e rrugëve paguhet si akcizë në çdo litër karburant.
3- Kjo taksë nuk përputhet me Strategjinë Kombëtare të Turizmit dhe shkakton humbje financiare për buxhetin e shtetit.
4- Rajoni i Kukësit nuk ka një rrugë tjetër alternative që e lidh me pjesën tjetër të vendit.
“Për këto arsye, Ne i drejtohemi Qeverisë Shqiptare që ta konsiderojë kërkesën tonë për anulimin e taksës dhe do të presim reagimin e saj në një afat 10 ditor, përpara se bashkërisht të ndërmarrim hapa të tjerë të reagimit publik, mbyllje të bizneseve, protesta deri në mosbindje civile”, thuhet në njoftimin për aktivitetin.
Kjo kërkesë do t’i drejtohet Kryeministrit të Shqipërisë, Edi Rama; Ministrit të Transportit dhe Infrastrukturës, Sokol Dervishaj; Kryetarit të Kuvendit të Shqipërisë, Ilir Meta; Kryetarit të Grupit Parlamentar të PS, Gramoz Ruçi; Kryetarit të Grupit Parlamentar të PD, Edi Paloka.
Në takim, në mbështetje të shoqatës doli edhe deputetja demokrate Mimoza Hajdarmataj, sipas së cilës, kjo taksë e fut në kolaps shkëmbimin tregtar, komunikimin ndërsektorial të Shqipërisë me Kosovën.
“Nga ana tjetër, Veriun e izolon edhe më tej dhe mbyll edhe më shumë ato pak hapësira për tregti e punësim.Është demagogji krejt manipuluese, se taksa kaq e lartë i duhet mirëmajtjes së rrugës.
Në fakt i duhet kësaj qeverie dhe kryeministrit, të rrjepë edhe më shumë nga mundi e sakrifica e shqiptarëve. Bashkë me kolegët e tjerë të Opozitës, vecanerisht të zonave të veriut, do jemi bashkë me ju, barrikadë në parlament e kudo për këtë kauzë sa ekonomike aq edhe politike e patriotike”-tha deputetja.
