Përgjegjësja e Departamentit të Epidemiologjisë dhe Kontrollit të Sëmundjeve Infektive në Institutin i Shëndetit Publik, Silva Bino tha se testet për COVID-19 po kryehen për të gjithë personat e dyshuar dhe se nuk do të shpërdorohen për ata që kanë frikë se janë pa simptoma.
“Nuk bëjmë pak teste, por bëjmë testet e duhura. Të gjithë personat e dyshuar janë testuar, nuk mendojmë të shpërdorojmë teste për personat që kanë frikë se mund të jenë prekur, por tek personat kanë indikacione për këtë gjë. Qëllimi jonë është rritje e testimit, testimi nuk është mjeti që zgjidh çdo gjë, por izolimi dhe karantina janë mjeti i duhur për luftën e kësaj sëmundje”, tha Bino.
Ajo bëri të ditur gjithashtu se nstitucionet shqiptare po marrin në konsideratë futjen e testeve të shpejta por gjithësesi laboratori i ISHP-së do të mbetet referencë.
“Në lidhje me testet e shpejta, një pjesë e tyre po vlerësohen, ka një test që është miratuar nga një agjenci në SHBA, kanë të mirat dhe kufizimet e veta. Po merren në konsideratë në bazë të shkallës së vlerësimit, që në vend të kemi ato teste që na sigurojnë cilësinë. Gjykimi klinik dhe epidemologjik është shumë i rëndësishëm, përveç testit. Laboratori i ISHP-së mbetet laboratori i referencës” tha ajo.
Disa ditë më parë në SHBA u aprovua një test i shpejtë për koronavirusin i cili e nxjerr rezultatin për 45 minuta. Kompania që i ka prodhuar planifikon të fillojë shitjen e testeve në fund të marsit. /Opinion.al
