27-vjeçarja Deizi Arapi, të cilës iu dogj makina para banesës mëngjesin e sotëm në Bilisht ka dalë në një deklaratë për mediat dhe i ka kërkuar ndihmë shtetit që ta mbrojnë.
Teksa thekson se është hera e dytë brenda 4 vitesh që i digjet makina, Arapi thotë se i di me emra dhe me fakte se kush janë personat e perfshirë në ngjarje.
Ajo tha se ditën e djeshme ishte ndjekur nga një person, ndërsa shton se në vendin e ngjarjes kishte gjetur dhe bidonin e benzinës të përdorur për djegien e makinës.
“I bëj thirrje shtetit shqiptar se është hera e dytë që më djegin makinën, është hera e dytë që ndodh në një interval kohe prej 4 vitesh. Unë jam femër. As kam vrarë, as kam prerë, as kam bërë ndonjë krim që të ngrihem në orën 2 e gjysmë të natës dhe të gjej këtë që shikoni dhe vetë. Ju lutem se jeta ime është në rrezik, nuk mund të fle dot e qetë. Nuk mund të dal dot. Nuk mund të parkoj dot makinën jashtë shtëpisë se do e gjej në këtë gjendje. Unë kam dyshimet e mia se kush ma ka bërë. Kam parë skenën, kam parë personin që më ruante, i kam me emra, i kam me fakte. Personi është treguar neglizhent se ka harruar edhe bidonin e benzinës që e ka hedhur. I kërkoj shtetit që të paktën kësaj radhe të verë dorën në zemër, se kemi familjarë në shtëpi. Ka qenë i njëjti person që ka qenë mbrëmë duke më ruajtur, kemi shkëmbyer dy fjalë bashkë, por duket që ka qenë në pritje të parkimit të makinës sime dhe më pas të kryente aktin. I lutem shtetit të verë dorën në zemër, është hera e dytë, herën e tretë besoj do më gjeni kanaleve e sigurt”, u shpreh Arapi.
Ndër të tjera,e reja tha se konflikti ka lidhje me pushimin nga puna të së ëmës në bashki.
“Dyshoj për një konflikt shumë të vjetër që ka të bëjë me heqjen e mamasë time nga puna dikur me një ish-kryetar që ka qenë në qytetin e Bilishtit, i cili e hoqi mamanë time nga puna në mënyrë mizore. Patëm një konflikt me kryetarin sepse na përplasi derën turinjve dhe që prej asaj kohe na u dogj makina ime…”, tha ajo.
