Fatura që paguajnë qytetarët shqiptarë për biletat e shtrenjta është rreth 200 milionë euro, për shkak të dominimit të dy linjave ajrore. Kështu mendon Ish-ministri i financave Arben Ahmetaj, i cili tashmë drejton Komisionin e Ekonomisë. Ai i ka kërkuar Autoritetit të Konkurrencës që të nisë një hetim të thelluar për kompanitë ajrore lidhur me çmimet e biletave.
“Shqetësimi im është që duket sikur është një treg i lirë, por në fakt janë dy kompani, Alitalia si dhe Austrian Airlines që për të njëjtat segmente fluturimi ofrojnë çmime disa herë më të lartë se kompanitë e tjera. Sipas një përllogaritjeje kostot që rëndojnë tek konsumatori kapin shifrën e 200 milionë eroreve. Mendoj se ky është një treg që ka nevojë për një investigim më të thelluar si dhe të dalim me rezultate konkrete”- u shpreh Ahmetaj.
Deri më tani qeveria ka bërë një auditim të kontratës koncesionare të aeroportit “Nënë Tereza”, nga ku rezultoi se ka një disbalancë ekonominë në dëm të shtetit, pasi kompania ka një normë të lartë fitimi.
Nga ky auditim, qeverisë i lind e drejta të kërkoj rishikim të kontratës, me synim ulje të tarifave aeroportuale, çka për rrjedhojë do të ndikojë në ulje të çmimit të biletave. Një tjetër problem është dhe kolaudimi i automjeteve, koncesion të cilin Arben Ahmetaj e cilësoi turp.
Por kryetarja e Autoritetit të Konkurrencës, Juliana Latifi, theksoi se ky institucion nuk ka bashkëpunimin e nevojshëm me qeverinë, dhe se rekomandimet e lëna për tregjet ku janë konstatuar abuzime, nuk janë vënë në zbatim.
“Kemi bërë rekomandime për Ministrinë e Infrastrukturës dhe Energjisë, si në rastin e koncesionit të SGS, kolaudimit të makinave ashtu edhe për koncesionin e portit të Durrësit kaladën lindore. Për të dy këto raste kemi dhënë rekomandime për ndryshime të kuadrit ligjor. Por nuk janë marrë në konsideratë nga ministria. Kemi dhe disa shkresa zyrtare që i kemi dërguar këtij institucioni, por nuk kemi patur ndrysshim të situatës”-u shpreh Juliana Latifi, kryetare e AK. /Opinion.al
