Këngëtarja e njohur Nexhmije Pagarusha ka përfunduar në spital në mesnatë. Ajo po trajtohet në Qendrën Klinike Universitare të Prishtinës dhe është jashtë rrezikut për jetën. Lajmi është transmetuar nga mediat në Kosovë, duke cituar edhe zëdhënësin e QKUK-së, Shpend Fazliu. Ai tha se 85-vjeçarja ishte lënduar në shtëpi, pasi i kishte rënë një dollap përsipër.
“Zyra e informimit QKUK, ju konfirmon se pacientja N.P, ka kërkuar ndihmë mjekësore si pasojë e lëndimeve që ka marrë në shtëpi. Është dhënë ndihma mjekësore në kuadër të klinikës emergjente dhe është jashtë rrezikut për jetë. Janë duke vazhduar ekzaminimet tjera diagnostike në kliniken e radiologjisë në QKUK”, ka thënë Shpend Fazliu. Ndërkohë gjendja e saj është e qëndrueshme dhe jashtë rrezikut për jetën.
“Bilbili i Kosovës”, “Mbretëresha e muzikës shqiptare”, “Këngëtarja e Shekullit”, “Artiste e Merituar” , “Nderi i Kombit”, janë vetëm disa prej epiteteve dhe dekoratave që këngëtarja më e madhe kosovare e të gjitha kohërave, Nexhmije Pagarusha, i ka merituar gjatë dekadave të karrierës së saj artistike. Ajo para pak muajsh festoi 85 vjetorin.
