Tërmeti i fuqishëm prej 5.3 ballë që goditi Korçën shkatërroi plotësisht 121 shtëpi.
Ky është bilanci zyrtar që arriti shtabi i Emergjencave Civile në qytetin juglindor, ku 65 prej këtyre banesave janë në fshatin Floq, 34 në Qafëzez dhe 22 të tjera në Vidohovë.
Prefekti i Korçës Dhori Spirollari tha se autoritetet lokale po diskutojnë nëse këto ndërtesa do të rindërtohen apo do të zhvendosen në troje të tjera, ndërsa prefekti paralajmëroi komisionerët e vlerësimit të mos bëjnë vlerësime të gabuara të dëmeve, me qëllim përfitimet politike.
Po ashtu dëmet nga tërmeti në Bashkinë e Kolonjës pëllogariten paraprakisht në 93 milionë lek të reja, por pritet që vlera përfundimtare e dëmit të përllogaritet nga komisioni i ekspertëve. Nga verifikimi paraprak në terren rezulton se në fshatin Qafëzez ka 100 shtëpi të dëmtuara, ndërsa 40 shtëpi janë dëmtuar në fshatrat Selenicë, Vodicë, Helmes, Butkë, Shtikë.
Sipas Shtabit të Emergjencave Civile, 34 shtëpi do të rindërtohen nga themeli, pasi janë të shkatërruara plotësisht, ndërsa 100 shtëpi do të rikonstruktohen./Opinion.al
