“Peshkimi” mes lojtarëve të padëshiruar të klubeve më të mira europiane është një ide e mirë, këtë e dinë mirë tifozët e Inter: në 2004-ën kanë kompletuar mesfushën për 10 vite me Esteban Cambiasso, dhe në verën e 2009-ës kanë vënë qershinë mbi tortë me Sneijder, i cili ka qenë një nga protagonistët e zikaltërve të Mourinho-s, që kanë fituar “Tripletën” në fund të sezonit. Si çdo verë, blerjet e mëdha krijojnë pakënaqësi te yjet e klubeve të ndryshme europiane, të cilët nuk duan ta kalojnë sezonin në stol dhe një situatë e tillë krijon mundësinë që këta lojtarë të merren për shifra të pranueshme dhe që të pranojnë një ulje të rrogës.
Kampionati që ofron më shumë raste të tillë është ai anglez, ku kalimi i Mourinho dhe Guardiola ka përmbysur hierarkitë e vitit të kaluar: te “Citizens” Pep ka përgatitur largimet e portierit Joe Hart (29 vjeç), talentit franko-algjerian Nasri (29 vjeç), mbrojtësit Mangala (25, pjesëtar i kombëtares franceze); teksa Mourinho ka larguar menjëherë 21-vjeçarin Januzaj dhe veteranin Bastian Schweinsteiger. Ndër të tjera trajneri portugez duket se nuk e pëlqen shumë mbrojtësin italian Matteo Darmian (27 vjeç), dhe duhet kuptuar nëse Fellaini do të jetë dakord me rolin e zëvendësuesit të Pogba. Me pas vjen Newcastle i Benitez, që ka përfunduar në Championship, dhe ku mund të jetë më e lehtë të “peshkohet”: përveç Moussa Sissoko (27 vjeç), duhet bërë kujdes edhe ndaj holandezëve de Jong (27 vjeç, fantazist) dhe Daryl Janmaat (27 vjeç, mbrojtës krahu). Në fund, gjithmonë te Newcastle, mund të merret për një çmim të mirë mesfushori Cheik Tiote, 30 vjeç.
Në zonën e Londrës, tek Arsenal ka shumë pakënaqësi pas humbjes në javën e parë të kampionatit kundër Liverpool, me Ozil dhe Alexis Sanchez që janë përfolur për një largim nga “Emirates”. Për sa i takon Chelsea-it, “Blutë” kanë fantazistë dhe sulmues të dytë me shumicë: Hazard, Willian, Oscar, Cuadrado, Fabregas, Marko Marin. Dy të parët janë të paprekshëm, ndërsa njëri mes Oscar dhe Cuadrado do të largohet; Marin është në kërkim të një ekipi ku mund të aktivizohet rregullisht, dhe pjesë e ekipit të Conte-s është edhe Van Ginkel, i cili ka luajtur në Itali me fanellën e Milan, por pa bindur.
Në tokën spanjolle numri i të pakënaqurve është më i vogël, por më cilësor: te Real Madrid është James Rodriguez (25 vjeç, fantazist, që i është ofruar Chelsea-it në këmbim të Fabregas), Mateo Kovacic (22 vjeç, mesfushor) dhe Raphael Varane (23 vjeç, mbrojtës). madrilenët kanë bërë të ditur se nuk ka asnjë pakënaqësi, por realiteti tregon të kundërtën. Edhe Arda Turan po luan shumë te Barcelona tani, por në momentin që do të kthehet Neymar, turku do të kthehet në stol, nga ku do të shijojë spektaklin e MSN. Me pak fjalë, duke përjashtuar Juventus-in që ka bërë disa blerje të rëndësishme, klubet e tjerë të kampionatit italian si Milan, Inter, Roma dhe Napoli mund t’i shfrytëzojnë këto mundësi të arta për t’i kthyer Serisë A atë shkëlqim që e ka humbur prej disa vitesh tashmë.
