Viti 2022 ka nisur me një fluks të shtuar të vaksinimeve anti-Covid ku në 24 orë u arritën deri në 12 mijë injektime në rang kombëtar. Por fundi i Janarit ka shënuar një rënie të ndjeshme.
Mesatarisht në këto ditë janë regjistruar 5 apo 6 mijë injektime të vaksinave, ndërsa 31 Janari ka shënuar dhe ditën me shifrën më të ulët , 1606 vaksina në të gjithë vendin.
Në 10 ditët e fundit të Janarit në të gjithë vendin janë regjistruar në total 53,810 vaksinime anti-Covid.
Bazuar në të dhënat zyrtare të Ministrisë së Shëndetësisë shohim se edhe në muajin Shkurt ritmi i vaksinimeve është i njëjtë, duke mos e tejkaluar 6000 injektime në rang kombëtar.
Specialistët e Institutit të Shëndetit Publik thonë se kjo rënie ka ardhur si pasojë e numrit të lartë të infektimeve me Omicron.
Burime zyrtare thanë për televizionin Klan se fakti që ajo kategori e cila duhet të vaksinohet po trajtohet për rikuperim nga infektimi me Covid ka bërë që numri i vaksinimeve të ketë një rënie të lehtë.
Aktualisht procesi i vaksinimit po vijon për të gjithë popullatën mbi 16 vjeç, ku 56% e saj është vaksinuar me 1 dhe 2 doza.
Po aplikohet edhe doza e 3 përforcuese për çdo person mbi 18 vjeç që ka kaluar të paktën 6 muaj nga dita e dozës së dytë.
Përgjatë muajit Janar janë realizuar rreth 200 mijë injektime të vaksinave anti-Covid në të gjithë vendin. Në total numri i vaksinimeve tashmë i ka kaluar 2 milionë e 600 mijë.
