Në një raport të Institutit të Statistikave në Shqipëri thuhet se popullsia në vend është më e ulët krahasuar me një vit më parë.
Sipas INSTAT, më 1 janar të këtij viti në vend jetonin 1.2% më pak krahasuar me 1 janarin e vitit 2024.
Me shifra përkthehet në 2 milionë e 363 mijë e 314 banorë.
Rënia e popullsisë ka ardhur si rezultat i dy komponentëve kryesorë demografikë: shtesës natyrore dhe migracionit.
Pavarësisht se në 2024-ën, ka pasur më shumë lindje se sa vdekje, gjithsesi lindshmëria në Shqipëri mbetet e ulët. Nga ana tjetër, statistikat e migracionit vijojnë të jenë negative pasi është shënuar largimi i mbi 28 mijë personave.
Sipas përllogaritjeve, vetëm qarku i Tiranës shënoi rritje të popullsisë, krahasuar me një vit më parë me 0,2 %. Ndërsa uljet më të mëdha të popullsisë u shënuan në qarqet Shkodër dhe Kukës.
Peshën më të lartë të popullsisë në vend e zë Tirana, Fieri dhe Elbasani.
“Tirana zë rreth 32,2 % të popullsisë gjithsej, duke vazhduar të jetë qarku më i populluar i vendit, ndjekur nga Fieri dhe Elbasani me nga 9,9 % dhe 9,6 % përkatësisht”, thuhet në raportin e INSTAT.
Krahasuar me 2024-ën, mosha mesatare ka njohur një rritje po ashtu me 0.8 vjeç, pra nga 43.5 vjeç ka shkuar në 44.3 vjeç./tvklan
