Presidenti Joe Biden tha të mërkurën se ka urdhëruar administratën që të vendoste sanksione ndaj kompanisë përgjegjëse për ndërtimin e gazsjellësit rus Nord Stream 2.
“Sot, kam urdhëruar administratën time të vendosë sanksione ndaj Nord Stream 2 dhe oficerëve të saj të korporatës. Këto hapa janë një tjetër pjesë e sanksioneve fillestare në përgjigje të veprimeve të Rusisë në Ukrainë. Siç e kam bërë të qartë, ne nuk do të hezitojmë për të ndërmarrë hapa të mëtejshëm nëse Rusia vazhdon të përshkallëzojë situatën”, tha Biden në një deklaratë.
“Përmes veprimeve të tij, Presidenti (Vladimir) Putin i ka dhënë botës një nxitje për t’u larguar nga gazi rus dhe nga format e tjera të energjisë”, shkroi Biden.
Lëvizja është pjesë e një sërë dënimesh që SHBA dhe aleatët e saj i kanë vendosur Rusisë këtë javë në përgjigje të njohjes nga Putini të territoreve separatiste në Ukrainën lindore si të pavarura.
Të mërkurën, shenjat e përshkallëzimit të krizës po shfaqeshin, pavarësisht grupit të ri të sanksioneve. Burime duke përfshirë kryeministrin e Letonisë i thanë CNN se trupat ruse kanë lëvizur në rajonin lindor të Ukrainës që Rusia e ka njohur tani si të pavarur.
“Sipas informacionit që kam në dispozicion, Putini po lëviz forca dhe tanke shtesë në territoret e pushtuara të Donbasit”, tha kryeministri letonez Arturs Krišjānis Kariņš për Jim Sciutto të CNN të mërkurën. “Me çdo përkufizim, ky është një kalim i një territori sovran në një vend fqinj.”
