Presidenti i SHBA Joe Biden në fjalimin e tij në OKB tha se lufta e Rusisë në Ukrainë ka si qëllim shuarjen e së drejtës së Ukrainës për të “ekzistuar si shtet, si popull”.
Biden tha se Rusia me nisjen e luftës ka shkelur parimet thelbësore të Kartës së Kombeve të Bashkuara.
“Një anëtar i përhershëm i Këshillit të Sigurimit të Kombeve të Bashkuara pushtoi fqinjin e tij, u përpoq të fshinte një shtet sovran nga harta. Rusia ka shkelur paturpësisht parimet thelbësore të Kartës së Kombeve të Bashkuara. Kjo luftë ka të bëjë me shuarjen e së drejtës së Ukrainës për të ekzistuar si shtet, qartë dhe thjeshtë, dhe të drejtën e Ukrainës për të ekzistuar si popull”, tha Biden
Më tej ai theksoi: “Pak para se të pushtonte Ukrainën, Putini pohoi, ‘Ukraina u krijua nga Rusia’.”Dhe tani ne shohim sulme në shkolla, stacione hekurudhore, spitale.. dëshmi edhe më të tmerrshme të krimeve të luftës të Rusisë”.
Presidenti amerikan i referohet gjithashtu varrit masiv të zbuluar së fundmi në Izyum, për të cilin ai tha se “tregonte shenja torture”.
“Kjo është arsyeja pse 141 kombe në Asamblenë e Përgjithshme u mblodhën për të dënuar pa mëdyshje luftën e Rusisë kundër Ukrainës”-tha Biden.
Biden thotë se SHBA dëshiron që kjo luftë të përfundojë me “kushte të drejta” – “me kushte për të cilat ne të gjithë kemi nënshkruar” duke shtuar se një vend nuk mund të pushtojë territorin e një kombi me forcë.
Ai thotë se anëtarët e OKB-së duhet të jenë “të qartë, të vendosur dhe të palëkundur”.
“Ukraina ka të njëjtat të drejta që i përkasin çdo kombi sovran. Ne do të solidarizohemi me Ukrainën dhe kundër agresionit të Rusisë”- vijoi Biden.
