Presidenti turk Erdogan, ka reaguar pas vendimit të presidentit amerikan Biden, lidhur me çështjen e masakrës turke kundër armenëve.
“Aksush nuk duhet të marrë përparësi nga fakti, që debatet që duhet të bëhen nga historianët, politizohen nga palë të treta dhe kthehen në një mjet të ndërhyrjes në vendin tonë”, shkroi Erdogan në një mesazh dërguar patriarkut Armen në Stamboll.
Presidenti i Shteteve të Bashkuara, Joe Biden ka njohur zyrtarisht masakrën kundër armenëve nga Perandoria Osmane gjatë Luftës së Parë Botërore, si gjenocid.
“Çdo vit në këtë ditë, ne kujtojmë jetën e të gjithë atyre që vdiqën në gjenocidin armen në epokën Osmane dhe ne zotohemi sërish për të parandaluar që mizori të tilla të ndodhin sërish. Ne nderojmë viktimat e Meds Yegher në mënyrë që tmerret e asaj që ndodhen të mos harrohen kurrë në histori. Ne kujtojmë në mënyrë që të vazhdojmë të jemi vigjilentë ndaj ndikimit të urrejtjes në të gjitha format”, tha Biden në një deklaratë të lëshuar më 24 prill, në Ditën e Përkujtimit të Gjenocidit armen.
Por ky veprim i Presidentin Amerikan ka ngjallur reagime zyrtare nga ana e shtetit turk. Ministri i Jashtëm Mevlut Cavusoglu, përmes një publikimi në tuiter tha se Turqia e refuzon këtë deklaratë.
“Fjalët nuk mund ta ndryshojnë historinë apo ta rishkruajnë atë. Ne nuk do të pranojmë leksione nga askush për historinë tonë. Oportunizmi politik është tradhtia më e madhe për paqe dhe drejtësi. Ne plotësisht e refuzojmë këtë deklaratë, e cila është e bazuar në populizëm”, tha ai.
Sipas Ministrisë së Jashtme Turke, e cila ka dalë në një deklaratë, vendimi i Biden nuk do të ketë efekt tjetër përveç polarizimit të kombeve dhe pengimit të paqes dhe stabilitetit në rajon. “Ne i bëjmë thirrje Presidentit të SHBA-së të ndreqë këtë gabim serioz, i cili nuk shërben për asnjë qëllim tjetër përveç se të kënaqë qarqe të caktuara politike dhe të mbështesë përpjekjet për të vendosur bashkëjetesën paqësore në rajon, veçanërisht midis kombeve turke dhe armene, duke mos shërbyer për axhendën e atyre qarqeve që përpiqen të provokojnë armiqësi”, thuhet në deklaratën e Ministrisë së Jashtme turke./Opinion.al
