Presidenti amerikan në largim Joe Biden e kaloi ditën e tij të fundit në detyrë në Charleston të Karolinës së Jugut nga ku i kërkoi popullit amerikan të besonte se ditë më të mira do të vijnë përpara.
Një ditë para festës federale që nderon liderin e vrarë të të drejtave civile Martin Luther King Jr., Biden kujtoi ndikimin e lëvizjes për të drejtat civile dhe dha një ton shpresëdhënës për të ardhmen e vendit.
“Duhet të mbajmë shpresën. Duhet të qëndrojmë të përkushtuar. Ne duhet të mbajmë gjithmonë besim në një ditë më të mirë”, tha Biden.
Në fjalimin e tij televiziv të lamtumirës të mërkurën e kaluar, ai pikturoi një pamje të zymtë të së ardhmes së Shteteve të Bashkuara dhe foli për një oligarki të super të pasurve.
“Ne hymë në detyrë duke u përballur me një nga periudhat më të vështira në historinë tonë. Ne ia dolëm të mposhtnim pandeminë, të ndërtojmë ekonominë më të fortë në botë me disa nga investimet më të rëndësishme të bëra ndonjëherë në të gjithë historinë amerikane, veçanërisht për amerikanët me ngjyrë për të trajtuar racizmin e qëndrueshëm sistematik dhe avancimin e barazisë racore. Nga liria për të votuar te liria për të zgjedhur, për të rikthyer lidershipin e Amerikës në botë, duke përfshirë përpjekjet tona intensive që çuan në lirimin e pengjeve dhe një armëpushim të luftës në Gaza dhe përfundimin e luftës midis Izraelit dhe Hamasit”, u shpreh Biden.
Karolina e Jugut ka një rëndësi të veçantë për Bidenin pasi ai fitoi zgjedhjet paraprake të Demokratëve të vitit 2020 atje, gjë që e afroi atë me presidencën. “Jam shumë borxhli ndaj jush,” tha ai.
Biden kujtoi të kaluarën mizore të skllavërisë në SHBA dhe foli me kongregacionin e Kishës Baptiste Misionare Mbretërore se pse ai hyri në shërbimin publik – Martin Luther King Jr dhe Robert F. Kennedy ishin modele politike.
Në Charleston, Biden u sulmua nga kritikët të cilët fajësuan administratën e tij për shitjet e armëve amerikane në Izrael dhe pretenduan se SHBA nuk ka bërë sa duhet për të lehtësuar krizën humanitare në Rripin e Gazës.
Ndërsa autokolona e tij kalonte nëpër Charleston, një grup brohoriti “Biden është një kriminel lufte”, sipas AP.
