Sot në seancën plenare janë betuar dy deputetët e listës së Partisë Demokratike, Arben Elezi dhe Adriatik Alimadhi, ndërkohë ka munguar kandidatja e Lëvizjes Socialiste për Integrim Amra Barova.
Nuk është dhënë një arsye se përse Barova nuk ka qenë e pranishme në sallën e Parlamentit për të kryer betimin. Ashtu si edhe dy kandidatët e tjerë, ajo mori dje mandatin nga Komisioni Qendror i Zgjedhjeve.
Adriatik Alimadhi nga lista e Vlorës është kryetari i Ballit Kombëtar dhe në hyrje të selisë së Parlamentit tha se Lulzim Basha nuk kishte respektuar asnjë marrëveshje me aleatët. Nga ana tjetër, Arben Elezi tha sot se ishte i gatshëm të votonte reformën zgjedhore.
“Pranimi i mandatit është vendimi më i drejtë, pasi jam kandidati që në zonën më problematike, Peqini mora më shumë vota krahasuar me kandidatët e tjerë dhe askush më shumë se unë nuk kishte të drejtë që të përfaqësonte atë zonë. Listat e mbyllura nuk shprehin vullnetin e votuesve shqiptarë. Unë jam për sistem mazhoritar dhe lista të hapura. Do të votoja me shumë dëshirë ndryshimin e sistemit zgjedhor. Do të votoj çdo ligj në interesin e shqiptarëve”, tha Arben Elezi në seancën plenare./Opinion.al
