PS dhe PD do të masin “forcën” në Kavajë. Sot PS ka thirrur simpatizantët e saj në miting ndërsa PD i ka thirrur të dielën një protestë mbarëpopullore.
Kjo është sfida e parë e dy partive të mëdha në prag të zgjedhjeve të anetemuara dhe bojkotuara nga demokratët.
Partia Socialiste njoftoi se do të zhvillojë mitingun përmbyllës në Kavajë pasditen e së premtes, për zgjedhjet e pjesshme vendore.
Një numër i madh i përfaqësuesve të PS do të marrin pjesë sot në këtë tubim, ku do të kërkohet vota për kandidatin e majtë Klodjan Shehi.
Burime pranë PS-së bëjnë të ditur se në këtë takim do të marrë pjesë dhe kryeministri Edi Rama i shoqëruar nga ministra të kabinetit qeveritar si dhe deputetë të qarkut të Tiranës.
Demokratët kanë paralajmëruar një marshim të madh popullot në drejtim të këtij qyteti, ku nuk përjashtohen as tentativat për të bllokuar procesin e votimit.
Basha tha sot nga çadra e opozitës, se do të ketë një marshim popullor të opozitës drejt Kavajës, nga ku tha ai, të dielën do të rrëzohet republika e vjetër.
