Kolegji i Posaçëm i Apelimit mbylli paraditen e sotme shqyrtimin e çështjes së prokurores Rovena Gashi, në mungesë të saj.
Prokurorja u largua nga seanca, pasi trupa gjykuese ia rrëzoi sërish kërkesën për të patur asistente motrën e saj Ema Gashi.
Trupa e Kolegjit të Posaçëm të Apelimit tha se për shkak të afateve të procedurave, Ema Gashi rezulton të jetë gjyqtare në Gjykatën e Rrethit Durrës, ndaj e vazhdoi seancën në mungesë të prokurores Gashi.
Trupa lexoi gjetjen e bërë nga monitoruesja e huaj, Mia Roessingh e dorëzuar më 15 Mars, gjetje e cila sipas Operacionit Ndërkombëtar të Monitorimit nuk është në favor të prokurores Gashi.
Kujtojmë se Rovena Gashi u shkarkua në korrik të vitit 2018, pasi ishte nën hetim për fshehje pasurie, dhe sipas Komisionit të Pavarur të Kualifikimit, ajo ka dhënë përgjigje të pavërteta, të ndryshme dhe kontradiktore nga dokumentet dhe kontratat e nënshkruara prej saj.
Ndërsa ILDKPKI në raportin e saj ka konstatuar se deklarimet nuk janë te sakta, ka mungesë burimesh për blerjen e apartamentit të blerë te Shkëmbi i Kavajës, dhe një në Tiranë./Opinion.al
