Është i dyti në radhët e politikanëve gjermanë, pas raportuesit për Shqipërinë në Komisionin e Jashtëm, Christian Schmidt. Këshilltari i CDU-së, Martin Henze mbështet opozitën.
Kryekëshilltari për ekonominë i grupit të kristian-demokratëve gjerman të Angela Merkel, situatën shqetësuese në Shqipëri e sheh të induktuar jo nga mungesa e stabilitetit politik, por atij institucional të drejtësisë.
“PD-së i është mohuar e drejta parlamentare sepse mungon Gjykata Kushtetuese, që do të thotë se PD dhe opozita s’ka të drejtë të apelojë vendimet e parlamentit. Ndaj largimi i PD-së nga parlamenti edhe mund të kuptohet”.
Për Martin Henze, kritikat e ardhura nga përtej kufijve, përfshi edhe shtetin e tij Gjermani, lidhur me djegien në bllok të mandateve të opozitës, janë rezultat i seleksionimit të qëllimshëm.
“Në Europë ka mendime kontradiktore për këtë. Jo çdo gjë që transmetohet në Shqipëri mbi kritikat e Europës për djegien e mandateve është e vërtetë sepse këtu vijnë informacione të selektuara dhe filtruara. Ka mendime të ndryshme për këtë pikë”.
Sa i përket opozitës së re parlamentare dhe njohjes së saj si legjitime në përfaqësimin e asaj pjese të popullsisë që votën ja dha partive opozitare, Henze del kundër kreut të OSBE-së Berndt Bochard.
“Duke qenë se deputetët vijnë nga lista e partisë, pra është votuar partia jo kandidati kjo lejon mundësi për interpretim. Këtë mund ta bëj vetëm Gjykata Kushtetuese që nuk ekziston. Kjo bën që të mbetet situata e paqartë. Ndaj mendoj që OSBE nuk mund të thotë nëse është legjitime apo jo, sa kohë kushtetuesja nuk shprehet dot”./Opinion.al
