Nga deklarata e përditshme për shtyp, Sali Berisha iu përgjigj deklaratave të Taulant Ballës, i cili më herët sot tha se “nëse opozita nuk merr pjesë në komisione, atëherë do të ndryshojë formula për anëtarë të barabartë”.
Berisha iu rikthye debatit për zgjedhjen e avokatit të popullit, ki tha se Balla “deri në darkën e ditës para votimit, përfaqësuesit tonë i ka thënë “nuk jam dakord për Shabanin, por këtë e vendos Rama.”
“Se çfarë ka bashkëbiseduar me ambasadorin, nuk e di”-tha Berisha.
Sali Berisha: Sa i përket deklaratës së Tao-s, duhet të them vetëm kaq. Partia Demokratike nuk ka njohur zgjedhjet, ka arritur për herë të dytë në historinë e pluralizmit damkosjen ndërkombëtare të tyre duke paraqitur qindra dhe mijëra fakte. Do paraqesim botimin tonë prej 1500 faqesh për dhunën grabitjen, farsën zgjedhore. Partia Demokratike u angazhua në një proces duke menduar se në mbështetje të rekomandimeve të OSBE/ODIHR do mund të bëheshin disa ndryshime, me bindjen se çdo ndryshim nuk bën zgjedhje të lira, për sa kohë Edi Rama të jetë në pushtet.
Me aktin që kryen me Avokatin e Popullit shkelmuan çdo parim të bashkëpunimit minimal. Ata zgjodhën avokat njeriun e Edi Ramës. Hynte e dilte e bënte pazare me të. Zgjodhi avokat njeriun të cili firmat I ishin dhënë për të qenë në listë dhe ky ishte një gabim, por kurrë për të qenë Avokat i Popullit. Firmat e dhëna, e them, gabim, prandaj kam kërkuar ndjesë, u tërhoqën që të gjitha.
Meqenëse doli me lavdërime, s’është në natyrën time të nxjerr gjëra konfidenciale, por ky person pa karakter, deri në darkën e ditës para votimit, përfaqësuesit tonë i ka thënë “nuk jam dakord për Shabanin, por këtë e vendos Rama. Se çfarë ka bashkëbiseduar me ambasadorin, nuk e di. Kjo është e tërë historia.
