Në konferencën për mediat, kreu i PD Sali Berisha ka deklaruar se zgjedhjet e 11 Majit janë, sipas tij “farsa më e shëmtuar në historinë e vendit me arkitekt, autor kryesor Edi Ramën”.
Sipas Berishës, në laptop-in e zv.kryeministres Belinda Balluku “përmbante të gjitha dokumentet se si patronazhistët e saj, nëpunës administrate, miklonin me oferta për punë me qindra mijëra qytetarë, banues në rrethin e Fierit”.
Për kryedemokratin tentakulat mafioze të patronazhistëve kanë shtrirë veprimtarinë në diasporë.
‘Tani, tentakulat mafioza të patronazhistëve të partisë së krimit nuk kënaqen vetëm me veprimtarinë brenda, por janë shtrirë po kaq në diasporë’, u shpreh Berisha.
Ai deklaroi se drejtorë dhe punonjës të të gjitha rangjeve kanë pasur detyra të caktuara për të garantuar vota në diasporë dhe votimin për PS-në.
“Në administratën e bashkisë Fier, njësitë administrative, në kadastër, zyrat e punës, drejtoritë e shërbimeve, ndërmarrjet publike në varësi të ministrive, OSHE, ujësjellës-kanalizim, mësues, sekretarë, staf ndihmës, njësitë e kujdesit shëndetësor, tatime, dogana, zyrat e sigurimeve shoqërore janë qendrat e punës të patronazhistëve famëzinj”, theksoi Berisha.
Pjesë nga fjala e Berishës
Sali Berisha: Tani, edhe njëherë farsa elektorale 11 maj 2025 ishte farsa më e shëmtuar në historinë e vendit me arkitekt, autor kryesor Edi Ramën, me avokat kryesor Altin Troplinin.
Laptopi ka zbuluar, dje ju patë se si laptopi i Lubi Ballukut sipas të dhënave, përmbante të gjitha dokumentet se si patronazhistët e saj, nëpunës administrate, miklonin me oferta për punë me qindra mijëra qytetarë, banues në rrethin e Fierit.
Tani, tentakulat mafioza të patronazhistëve të partisë së krimit nuk kënaqen vetëm me veprimtarinë brenda, por janë shtrirë po kaq në diasporë.
Drejtorë, punonjës të të gjitha rangjeve, me detyra të caktuara për të garantuar vota në diasporë dhe votimin për PS-në.
Në administratën e bashkisë Fier, njësitë administrative, në kadastër, zyrat e punës, drejtoritë e shërbimeve, ndërmarrjet publike në varësi të ministrive, OSHE, ujësjellës-kanalizim, mësues, sekretarë, staf ndihmës, njësitë e kujdesit shëndetësor, tatime, dogana, zyrat e sigurimeve shoqërore janë qendrat e punës të patronazhistëve famëzinj.
Ndërmarrje private nën ndikim shtetëror ose me lidhje politike. Votuesit jashtë vendit janë regjistruar me kode: si mbështetës i PS, i paqartë, mbështetës i opozitës, i paditur ose i panjohur.
Pra, kanë bërë gjithçka që të kontrollojnë vullnetin e qytetarëve.
Këta votues janë telefonuar ose kontaktuar direkt nga patronazhistët për t’i mikluar ose kërcënuar se do humbasin vendet e punës njerëzit e tyre.
Pra, kjo ka qenë një nga misionet e zeza të patronazhistëve në rrethin e Fierit dhe që nuk dallojnë, të njëjta në gjithë Shqipërinë.
Por ne morëm Fierin meqenëse i tregonte laptopi të gjitha të dhënat.
