Kryetari i Partisë Demokratike, Sali Berisha, ka premtuar se me ardhjen në pushtet të demokratëve, do të krijohen të gjitha lehtësitë e nevojshme që emigrantët shqiptarë të kthehen në atdhe.
Në një takim virtual me shqiptarë nga 62 qytete në botë, Sali Berisha bëri të ditur se bonusi i bebeve që jepet aktualisht, do të ofrohet edhe për fëmijët shqiptarë që lindin nëpër botë, pavarësisht nëse jetojnë ose jo në Shqipëri.
“Një sistem 5-vjeçar pa taksa për secilin prej jush dhe jo vetëm kaq, një mbështetje për strehimin dhe nevoja të tjera. Do bëhet gjithçka për një kthim të butë dhe të suksesshëm tuajin në Shqipëri. Sikundër, do marrë fund diskriminimi, ato bonuse që do jepen për çiftet e reja në Shqipëri për fëmijët e lindur, ato bonuse do jepen për shqiptarët që lindin kudo në botë. Do bëjmë gjithçka që me ata të cilët për shkak të pozicioneve që kanë nuk kthehen dot, të kontribuojnë dhe të punojnë në sektorët ku janë online, të kontribuojnë në fushën akademike të kërkimeve shkencore, teknologjisë”, u shpreh Sali Berisha.
Kryedemokrati hodhi akuza ndaj qeverisë socialiste për shpopullimin e Shqipërisë.
“Ky regjim, i cili në disa aspekte ka goditur më rëndë materien e kombit shqiptar se çdo regjim tjetër.
Vetëm në 10 vite statistikat e BE-së tregojnë se nga Shqipëria në hapësirën Shengen, emigruan 1 milion e 99 mijë shqiptarë, pa llogaritur këtu SHBA, Kanada e shtete të tjera që nuk përfshihen në hapësirën Shengen.
Në 10 vite rreth 45% e shqiptarëve u larguan nga Shqipëria. Në rast se vazhdon ky trend, Shqipëria e vërteta është se demografikisht shkon drejt reduktimit dhe mbetet thjeshtë një nocion gjeografik.
Në kohën kur ky vend, ju vetë e dini, pa pasuri përrallore, potenciale përrallore për secilin prej jush dhe gjithë shqiptarët që të ndërtojnë ëndrrën më të bukur të jetës në Shqipëri. Ndaj dhe thirrja ime është edhe këto 72 orë që kanë mbetur ta bëjmë natën ditë, të bëjmë çdo përpjekje për të regjistruar çdo shqiptar, shqiptare që njohim jashtë Shqipërisë në mënyrë që të firmosim në 11 maj ndarjen e Shqipërisë nga e keqja.
Të përmbysim një diktaturë të dytë, narkodiktaturën e instaluar dhe të bazuar mbi drogën, krimin dhe vjedhjen e shqiptarëve. Të krijojmë mundësitë reale që djemtë dhe vajzat e Shqipërisë të ndërtojnë ëndrrën e tyre në Shqipëri”, tha ndër të tjera Berisha.
