Në seancën e sotme plenare pati një përplasje mes ish-kryeministrit Sali Berisha dhe ministres Elisa Spiropali.
Nga foltorja e Kuvendit, Berisha në ‘cilësinë e mjekut’ i shpjegoi Spiropalit zhvillimin psiko-social te njerëzit duke thënë se ai ka 5 stade.
Sipas Berishës, kjo fazë e pestë siç thekson Freud quhet “zilia falike te vajzat”. Pas fjalës së tij, kryetarja e Kuvendit Lindita Nikolla e quajti jo etik fjalorin e Berishës dhe i ndërpreu fjalën këtij të fundit.
Debati në Kuvend
Berisha: Ke përdorur një term jo të fisshëm, por unë nuk merrem me të. Ti kërkon të bie në vulgaritet, unë nuk bie! Por unë jam mjek ata që janë mjekë në sallë këtu e dinë se Sigmund Freud në klasifikimin e zhvillimit psiko-seksual ka gjetur se ky zhvillim te qeniet njerëzore kalon në 5 stade. Stadi i tretë Elisa është stadi falik jo fatal! Në stadin falik i cili shfaqet 3 deri në 5 vjeç shumica e kalojnë, disa mbeten dhe disave u krijohet kompleksi i Edipit. Edhe kjo është e njohur te Edi Rama.
Lindita Nikolla: Kaloi koha zoti Berisha…
Sali Berisha: Elisa, do dal…Elisa, ky kompleks i stadit të 5-të ndodh dhe te vajzat, por Freud e quan zilia falike te vajzat. Dhe skam ça të them tjetër!
Lindita Nikolla: Një fjalor aspak etik që e ka bazën te urrejtja që keni ndaj grave dhe vajzave.
Ndërkaq, Berishës iu përgjigj edhe ministrja Spiropali.
Spiropali: Kush të mori me qira sot? Se kanë filluar të të marrin me qira tani nga njëri tek tjetri. Nga pronar absolut i veseve të pushtetit dhe të politikës për të mbajtur pushtet, tani je kthyer në një dyfagxhi me qira nga njëri tek tjetri dhe të hedhin ndonjë kockë këtej e andej gardhit në mënyrë të përzgjedhur për t’u marrë me njërin dhe me tjetrin. Doktor ta kuptoj edhe moshën edhe hallin dhe është e paimagjinueshme që një gjysh i cili duhet të ishte në shtëpi i mbyllur me turp sot del në foltoren e Kuvendit edhe përmend jo Frojdin, por problemet e tij të rënda, se sigurisht je i tkurrur, je i mpaktur, je i pamundur dhe nga këto biseda do bësh në foltoren e Kuvendit doktor se të tjera nuk mund të bësh.
Meqë fole për të varfrit e Shqipërisë, ti që paguhesh nga pasanikët më të mëdhenj të Shqipërisë, doktor, ti që vë gjoba këtej e andej. Ti që sulmon ata që nuk të japin ty as favore, ti që bën opozitën tënde të mjerë dhe selektive duke u paguar nga pasanikët, paratë e të cilëve i pastron yt bir, ca me punë, e ca me ndere, e ca me portale e ca me televizione, ku ti vazhdon sot të mbijetosh i mjetë.
Unë për ty kam vetëm dy fjalë. Më vjen keq. Më vjen keq për katandisjen tënde. Ti ke qenë kryeministër i këtij vendi dhe President. Dhe nga kryeministër snajperist je kthyer në një snajper me qira Sali. Keqardhje për ty, por gjithmonë e më keq do bëhesh. Ata që të përdorin në oborrin tënd dhe në gardhin përreth do të të lenë ashtu siç je i zhveshur nga çdo moral dhe plot vese e çdo dështim.
Ke hupur Sali! Kaloje poshtë kockën e Shkodrës, e di që të ka ngelur në fyt. Nuk ka ujë që të japin për të të mbijetuar që mund të ta kalojë poshtë atë kockë. Selam Sali dhe të pafshim këtu më shumë se ti je dëshmia më e gjallë se si nuk duhet të jetë një burrë shteti dhe t’u japësh leksione dhe vajzave e djemve, jo vetëm vajzave siç është këtu, se si është një monument i gjallë i turpit që mos t’i afrohen kurrë.
