Ish-kryeministri, Sali Berisha, në një deklaratë për mediat jashtë dyerve të Kuvendit, u shpreh se situata në veriun e Kosovës është më dramatike dhe më kritike se asnjëherë që nga lufta e çlirimit.
Në lidhje me reagimet e kryeministrit Edi Rama për këtë çështje, Berisha tha se kreu i qeverisë ka qenë këto vite ndihmës i Aleksandër Vuçiç dhe se i ka futur “thika pas shpine” Kosovës.
“Mendoj se situata në veriun e Kosovës, plumbat e bandave serbe në jelekët, por edhe plagosjet e ushtarëve të KFOR-it dëshmojnë se aty situata është më dramatike, më kritike se asnjëherë më parë që nga lufta e çlirimit të Kosovës. Mendoj se kjo shënon një degradim të paralajmëruar të gjendjes në veriun e Kosovës, të paralajmëruar për ata që e kanë të qartë se nacionalizmi serb në të gjithë qenien, ekzistencën, projektin e tij ka vetëm Serbinë e madhe dhe nuk ka asnjë projekt tjetër. Edi Rama ka qenë këto vite një ndihmës i shpifur i Aleksandër Vuçiç dhe ka futur thika pas shpine Kosovës në çdo moment. Në këtë kontekst, mos harroni fjalët e tij. “kur të fillojë lufta do më kërkoni mua që t’ju ndërmjetësoj tek vllai Vuçiq. Edi Rama është një aset i shpifur në duart e Vuçiçit”, u shpreh Berisha.
